Նոր տարին նոր երգեհոնով!
Ամանորին ընդառաջ` դեկտեմբերի 22-ին, «Լուիզա-Վ» երաժշտական դպրոցը ուրախացրեց բոլոր աշակերտներին, ուսուցիչներին և երաժշտասերներին Նիդերլանդներում հատուկ մեր դպրոցի համար արտադրված Johannus երգեհոնի շնորհանդեսով:
Այս գործիքը դարձավ ոգեշնչման և փոփոխության գլխավոր խորհրդանիշը, որով մենք մտնում ենք դպրոցի պատմության նոր փուլ։ Այն նոր հնարավորություններ է բացում երաժշտական ստեղծագործության համար, իսկ երգեհոնի դասարանի ընդունելությունը կմեկնարկի հունվարին:
Երգեհոնի շնորհանդեսը, որը մեզ նվիրեց մեր դպրոցի ուսուցչուհի, դաշնակահար, երգեհոնահար, մեր հրաշալի Կարինե Հովհաննիսյանը, դարձավ իսկական երաժշտության տոն։ Հնչեցին Բախի, Դակենի, Ֆիլիպսի ստեղծագործությունները, ինչպես նաև տեղի ունեցավ երգեհոնի պատմության կարճ դասընթաց։
Երգեհոնի դասարանը բաց է լինելու երեխաների և մեծահասակների համար՝ անկախ նրանց երաժշտական փորձից։
Երգեհոնային երեկոները կդառնան մեր դպրոցի ևս մեկ ավանդույթներից մեկը:
